"Assur" (Contén)

Antiga cidade asiria, capital do Imperio Asirio durante o II milenio a C, sita na beira dereita do Tigris. Dende o s IX a C foi desprazada por Nimrud (ou Kala ẖ ) e Nínive, pero conservou o carácter de cidade sagrada cunha poderosa clerecía. No seu xacemento arqueolóxico fixéronse importantes descubertas, como as do templo de Assur, o de Ištar, o duplo templo de Adad e Anu, e varias construcións de tipoloxía palaciana. A cidade foi destruída polos medas no 614 a C.

Nome do deus epónimo do estado asirio. Divindade guerreira, guía nas batallas e dispensador da vitoria. De forma antropomorfa, adoitábase representar cos símbolos da monarquía asiria ou con armas na man. O seu santuario principal estaba na cidade de Assur. A súa representación e os seus títulos foron atribuídos posteriormente polos persas ao seu deus Ahura Mazdā.