"Fitzroy" (Contén)

Xénero de árbores, da familia das cupresáceas, ao que pertence a especie Fitzroya cupressoides, endémica dos bosques subantárticos sudamericanos da cordilleira dos Andes e da costa de Chile. Caracterízase por presentar unha altura de ata 45 m, o tronco recto de ata 4 m de diámetro, a copa estreita piramidal e as follas perennes, con forma de escama, de 3 mm de longo, dispostas en verticilos de tres follas. É unha especie dioica de polinización anemócora; coas flores masculinas en amentos cilíndricos de ata 8 mm de lonxitude e as flores femininas en estróbilos globosos -de cor castaña, solitarios, de 8 mm de diámetro, constituídos por 9 escamas; as sementes presentan 2 ou 3 alas que facilitan a súa dispersión-. A madeira é lixeira, de cor castaña, resistente aos fungos e insectos e moi apreciada en carpintería.