Centro constituído pola Xunta de Galicia e polo Consello Superior de Investigacións Científicas, inaugurouse en 1993 en Santiago de Compostela co obxectivo de atender as necesidades de cálculo intensivo dos científicos galegos e proporcionar apoio a tarefas de investigación. Xestiona a Rede de Ciencia e Tecnoloxía de Galicia (Recetga), que une os centros de investigación da comunidade e proporciona acceso a Internet a través da RedIRIS, a rede pública española dedicada ao mundo da investigación. Nos superordenadores do Centro pódense realizar desde síntese de fármacos ata simulacións da evolución do clima.
Organismo constituído no ano 1963 co nome de CESNO (Consejo Económico-Sindical del Noroeste) como instrumento para o estudo da problemática socioeconómica de Galicia e para adecuar criterios arredor destes temas. Formado por diversas autoridades civís, xunto con funcionarios sindicais, que representaban os órganos de goberno, carecía de facultades executivas e de capacidade financeira para acometer proxectos. Estaba composto dun pleno, unha comisión permanente e unha comisión executiva.
