"Friuli" (Contén)

REXIÓNS

Rexión histórica do N de Italia. Conquistada polos romanos no s II a C, transformouse en ducado lombardo (586). Foi ocupada por Carlomagno (775), conquistada polos xermanos (922) e anexionada polo Sacro Imperio Romano Xermánico (962). Pasou a Venecia no 1420 e desde o s XVI Trieste, Gorizia e Gradisca pertenceron aos Habsburgo. Sometida ao dominio francés por Napoleón, foi anexionado a Austria (1815) e uniuse posteriormente a Italia (1866). En 1947 esta cedeu Gorizia a Iugoslavia. Como rexión administrativa forma parte da rexión autónoma de Friuli-Venecia-Xulia.

REXIÓNS

Rexión do NL de Italia, que comprende as provincias de Gorizia, Pordenone, Trieste e Udine (7.855 km2; 1.180.375 h [estim 2001]). A capital é Trieste. Limita ao N cos Alpes Cárnicos, ao NL cos Alpes Xulianos, ao L con Iugoslavia, ao S co Mar Adriático e ao O coa rexión do Veneto. O relevo presenta dous sectores ben diferenciados: o norte, montañoso, formado polos Alpes Cárnicos, Xulianos e os Prealpes, e o sur, plano e baixo, constituído por unha chaira aluvial formada, entre outros, polo río Tagliamento. O litoral é baixo e areoso, e forma abundantes lagoas; destaca o golfo de Trieste. A poboación está formada por italianos e friulanos (retorrománicos). A chaira é o sector máis aproveitado agricolamente; os produtos principais son os cereais, as patacas, as hortalizas e a viña. Na montaña os principais recursos son a gandería e a explotación forestal. A industria está en pleno desenvolvemento.