"Suevia" (Contén)

Nome latino de Suabia.

Antropónimo feminino de orixe toponímica que procede do latín Suevia, a patria dos suevos.

Revista publicada en Bos Aires a partir do 1 de xaneiro de 1913. Cesou o 18 de marzo dese ano. Subtitulada inicialmente “Revista gallega regionalista” saíu, con moitas irregularidades, dúas veces ao mes. Dirixida por Xoaquín Pesqueira, incluíu poesía, narrativa e ensaio en varias linguas e completou os seus contidos co humor gráfico de Castelao e Lourido. Desaparecida o 28 de xuño de 1913, Pesqueira refundouna a comezos de xaneiro de 1916, co subtítulo “Revista gallega”.

Revista publicada en Santiago de Compostela a partir do 7 de outubro de 1917. Cesou o 12 de marzo de 1919 (nº22). Subtitulada “Revista semanal de Literatura, Arte y Ciencias”, en xaneiro de 1918 pasou a ter unha periodicidade quincenal e, a partir de xullo dese ano, cambiou o subtítulo polo de “Revista mensual”. Dirixida por Manuel Ortiz Novo, a cabeceira xurdiu coa ruptura do grupo que elaboraba Maruxa, despois da que un sector fundou La Raza e outro Suevia. De carácter literario, incluíu composicións de todos os xéneros e contou coa participación de destacados escritores. A partir do 23 de xullo de 1918 (nº20) pasou a denominarse Suevia Literaria.

Empresa de produción cinematográfica creada en 1940 por Cesáreo González que se converteu nunha das máis importantes de España ata 1970. Abría todas as súas películas cunha vista aérea da ría de Vigo. Das súas producións destacan Polizón a bordo (F. Rey, 1941), Campeones (R. Torrado, 1942), Pena, penita, pena (M. Morayta, 1953), La Faraona (R. Cardona, 1956), El ruiseñor de las cumbres (A. del Amo, 1958) ou Los inocentes (J. A. Bardem, 1962). Desapareceu na década de 1980 e, en 1999, unha distribuidora e produtora videográfica madrileña recuperou o seu nome como homenaxe ao seu labor cinematográfico.