"Timoteo" (Contén)

PERSOEIRO

Impresor. Entre 1854 e 1858 tivo en arrendamento os obradoiros tipográficos de Francisco Arza, fillo de Pascual Arza, na Coruña, mentres Arza establecía outros en Santiago de Compostela, Pontevedra e Lugo. Editou Proyecto de ley para arreglo del notariado (1855), de Fermoso. Castor Míguez mercou este obradoiro en 1859.

GALICIA

Médico. Catedrático de Medicina da Universidade de Santiago de Compostela, participou na fundación do psiquiátrico de Conxo en Santiago, do que foi o primeiro director. Inventou diversos instrumentos cirúrxicos ou relacionados coa antisepsia. Publicou Memoria sobre las fuentes de conocimiento y método de enseñanza de anatomía patológica y patología general (1871) e Programa razonado de Anatomía Patológica y Patología General (1871).

PERSOEIRO

Músico e poeta grego. Compuxo diversos nomoi, ditirambos, himnos e encomios. O seu nomós titulado Os persas, conservado nun papiro do s IV a C, canta a Batalla de Salamina cun estilo rico no apartado léxico e métrico.

PERSOEIRO

Escultor. Continuador da escola de Fidias, traballou en Roma, nas estatuas de Ártemis no Palatino no templo de Asclepio en Epidauro e no mausoleo de Halicarnaso. Destacou na representación de nereidas e de níkai (vitorias). Atribúeselle a escultura de Leda e o cisne, coñecida a través de copias, e unha Atenea coa éxida estrelada.

PERSOEIRO

Político e xeneral, fillo de Conón. Estratega (378 a C), recuperou as illas do Mar Xónico (376-375 a C) pero, acusado en 373 a C polo seu fracaso no Mar Exeo, entrou ao servizo de Persia. Volveu a Atenas en 367 a C e combateu a hexemonía tebana. Non conseguiu reconquistar Anfípole nin o triunfo na Batalla de Embata (365 a C), motivo polo que se exiliou a Calcis.

PERSOEIRO

Discípulo e colaborador do apóstolo Paulo. Fillo de pai pagán e de nai xudeocristiá (Eunice), converteuno san Paulo. A tradición identificouno co xefe (bispo ou presbítero) da igrexa de Éfeso, destinatario de dúas epístolas neotestamentarias. Represéntase vestido de pontifical (bispo) ou con túnica e palio como os personaxes bíblicos; cun ídolo aos pés, en representación de Diana, un bastón nodoso na man, e pedras recollidas no manto; e leva, como atributos persoais, un rolo na man que alude á carta que lle mandou san Paulo. A súa festividade celébrase o 26 de xaneiro.