"Xenevra" (Contén)

Antropónimo feminino procedente do francés Genièvre, que vén da forma anglonormanda Guenièvre, e esta do galés Gwenhwyvar ‘espírito, elfo luminoso’ ou ‘que brilla no medio dos elfos’.

Personaxe da mitoloxía celta, muller do Rei Artur. A súa relación adúltera con Lancelote do Lago, prototipo do amor cortés, narrada na novela en verso Lancelot ou Le chevalier de la charrette (1177-1181) de Chrétien de Troyes, foi utilizada polos inimigos de Artur para destruír o seu reino e acabar cos cabaleiros da Táboa Redonda. Esta personaxe aparece na literatura galega na tradución medieval do Livro de Tristan (s XIV), ademais de en obras como Merlín e familia i outras historias (1955), de A. Cunqueiro, ou Amor de Artur (1982), de X. L. Méndez Ferrín.