Compostela, concilios provinciais de

Xuntanzas periódicas da Igrexa católica da diocese metropolitana de Santiago e as súas sufragáneas. O primeiro destes concilios, convocado polo arcebispo Diego Xelmírez, celebrouse en 1121, un ano despois de que a sé compostelana recibise o rango metropolitano. Os seguintes concilios celebráronse en 1122, 1124, 1125 e 1130. Os dous primeiros concilios da provincia de Compostela do s XIV reuníronse en Salamanca (1310), onde o arcebispo Rodrigo de Padrón dirixía o proceso contra os Templarios, e en Zamora (1312-1313). O derradeiro celebrouse en 1887, baixo a presidencia do arcebispo Xosé Martín de Herrera.