Cuíña, mestre de

Nome co que se coñecen dous pintores que traballaron en Santa María de Cuíña. O primeiro mestre pintou escenas que mesturan as figuras humanas coa decoración de letras góticas nun marco espacial indefinido; os motivos repártense de forma illada e, cando a superficie é moi extensa, distribúese a escena en franxas conectadas tematicamente co resto do mural. O segundo mestre realizou unha pintura mural influída polos modelos hispanoflamencos, de formas manieristas, caracterizadas pola introdución das escenas nun marco arquitectónico e pola pouca expresividade dos rostros. Deste segundo mestre destacan algunhas escenas, como a Verónica e as pinturas das capelas laterais de San Nicolao de Cis (1540).