dermóptero -ra

Relativo ou pertencente aos dermópteros.

Mamífero da orde dos dermópteros.

Orde de mamíferos que comprende animais que acadan os 40 cm de lonxitude. Caracterízanse por presentar unha membrana ou pataxio que se estende polos lados do pescozo e abrangue as extremidades ata o rabo, feito que lles permite realizar longos voos entre as árbores tras lanzarse ao baleiro amodo de paracaídas. Son animais arborícolas, que non adoitan baixar ao chan, e que viven nas selvas mestas do sueste asiático e do leste da India. De día permanecen pendurados das pólas coma os morcegos e de noite saen para alimentarse de follas, froitos e xermolos. A orde orixinouse a partir dos primeiros insectívoros e talvez as similitudes cos morcegos e primates sexan froito dunha converxencia evolutiva. Coñécense un gran número de fósiles desta orde, como Planetetherium, pero só subsiste un xénero: Cynocephalus, con dúas especies, C.volans, que habita nos bosques de Filipinas, e C. variegata, propia de Malaisia e Indonesia. Denomínanse popularmente como lemures voadores.