entierro del señor de Orgaz, El

Óleo sobre lenzo realizado por El Greco entre 1586 e 1588 para a igrexa de Santo Tomás de Toledo, onde se conserva. Coñecido tamén como El entierro del conde de Orgaz, representa o milagre acontecido durante o enterro de Gonzalo Ruíz de Toledo (?-1323), señor de Orgaz e benfeitor da igrexa, cando apareceron os santos Estevo e Agostiño para enterrar o corpo na sepultura. A escena divídese en dúas partes, na zona inferior represéntase o milagre e na superior, a gloria. Cómpre destacar que os personaxes da parte inferior son retratos de personalidades da época do pintor, vestidos con roupaxes do s XVI. Identificáronse, entre outros, Diego e Antonio de Covarrubias e un posible autorretrato do pintor. O tratamento das figuras, da luz e da cor é manierista.