Epilobium

Xénero de herbáceas, da familia das onagráceas, perennes, de follas simples enteiras e opostas ás inferiores, flores hermafroditas tetrámeras e actinomorfas de pétalos de cor rosa ou branca e cos 8 estames insertos nun hipanto. As sementes presentan un penacho de pelos, feito que lles permite a dispersión anemócora. Das 200 especies que comprende o xénero, en Galicia están presentes as E. angustifolium e E. collinum na metade leste, en matogueiras e bosques; E. duriaei, na metade leste, en ambientes húmidos da montaña; E. hirsutum, E. lanceolatum, E. parviflorum e E. palustre, en ribeiras e beiras de lagoas e regatos; E. montanum, en bosques e sebes da metade leste e E. obscurum e E. tetragonum en prados e lugares húmidos.