escalada

Acción de ascender por un lugar difícil, de moita verticalidade, utilizando os catro membros para progresar. Pódense diferenciar diversos tipos de escalada. Atendendo ao material onde se escala distínguese entre a escalada en rocha, escalada en xeo e escalada mixta, que é a combinación das dúas primeiras. Segundo a maneira de progresar, distínguese entre escalada libre, caracterizada polo uso exclusivo de mans e pés para agarrarse aos contactos; escalada artificial, en que o material colocado facilita o avance; e a escalada combinada, que alterna tramos de escalada artificial coa libre. Por último, segundo a finalidade perseguida, distínguese entre a escalada alpina, que ten por obxectivo acadar un cumio, e a escalada deportiva, en que o interese principal é a dificultade en si mesma que un itinerario poida presentar.

Intensificación progresiva e rápida dunha acción, especialmente política ou militar.