Eutelo

Antropónimo procedente do grego Eleutherios ‘que procede como home libre’, ‘liberal, xeneroso’, ou ‘libertador’. Presenta as variantes Outel, Toutel, Tutel, Leuter e mesmo Eleuterio como forma culta. Destacan con este nome santo Eutelo de París (s III ou IV), diácono de san Denís e santo Eutelo de Tournai (456-531), bispo desta cidade belga. A súa festividade celébrase o martes da Pentecoste en Moraña, o terceiro sábado de maio en Lagartóns, o último domingo de xuño en Mos e o segundo domingo de setembro en Rois.