fuso

1. s m [TÉXT]

   1. Barra pequena redonda de madeira que se vai adelgazando dende o medio ata os extremos cunha rosca na parte máis grosa e que serve, no fiado á man, impulsada cos dedos, para torcer o fío ou enrolalo a medida que se fía. Nas máquinas de fiado modernas o fuso ten a mesma finalidade, pero é de aceiro, está sostido por cilindros e o conxunto móntase en sistemas amortecedores das vibracións e compensadores de desequilibrio, co fin de permitir unhas velocidades de rotación máis altas.

   2. Barra pequena xiratoria destinada a torcer ou enrolar un fío ou soster unha bobina ou un carrete que roda mentres se enrola o fío.

2. s m

   Peza fusiforme con rosca en espiral de madeira ou de ferro que serve de eixe en determinados aparatos como o muíño, a prensa ou o lagar.

3. 1. s m [MAT]

      Porción dunha superficie de revolución comprendida entre dous planos meridianos.

   2. fuso cilíndrico [MAT]

      Porción de superficie cilíndrica comprendida entre dúas xeratrices.

   3. fuso cónico [MAT]

      Porción de superficie cónica comprendida entre dúas xeratrices.

   4. fuso esférico [MAT]

      Porción de superficie esférica comprendida entre dous semicírculos máximos.

   5. fuso horario [METROL]

      Cada un dos vinte e catro fusos convencionais nos que se dividiu a Terra para a unificación da hora internacional. Cada fuso ten 15° de lonxitude, aínda que, na práctica, os fusos son de forma irregular para poder respectar as grandes divisións político-administrativas. Todos os puntos da superficie terrestre comprendidos dentro dun fuso réxense pola mesma hora. O meridiano de Greenwich pasa polo centro do fuso base, que se estende de 7°30’ ao L a 7°30’ ao O. Os fusos numéranse de 0 -tempo da Europa Central- a +12 en sentido L e a -11 en sentido O. Europa está dividida en tres fusos (-1, 0 e +1). O territorio de países pouco extensos pertencen en xeral a un só fuso, mentres que os estados ou países moi extensos comprenden diferentes fusos.

4. s m [HERÁLD]

   Figura en forma de losanxe, pero máis estreita e longa ca esta.

5. fuso acromático/mitótico [BIOL]

   Estrutura citoplasmática formada por fibras finas de natureza proteica que se estenden entre dous citocentros e na que se insiren e orientan os centrómeros ou os cromosomas enteiros durante a mitose ou a meiose.

Frases feitas

• Beber coma un fuso. Beber moito.

• Dereito coma un fuso. Expresión que se usa para indicar que unha persoa obra de forma imparcial.

• Teso coma un fuso. Expresión que se usa para indicar que unha persoa é moi orgullosa.