granxa

Propiedade rural dedicada á explotación agrícola e gandeira e onde se encontra a vivenda, as cortes e os pendellos.

Explotación agrícola creada nos réximes socialistas mediante a expropiación ou nacionalización da propiedade privada. Afecta ás grandes extensións de terreo.

Explotación agrícola cubana de carácter estatal que xurdiu seguindo o modelo das granxas estatais da URSS. Teñen carácter extensivo e a produción pode ser mixta ou só dedicarse á gandería.

Escola ou centro educativo no que a inserción, no contorno natural e agrícola, como motivo de estudo de investigación e aprendizaxe, cobra un destacado protagonismo dentro do conxunto das súas actividades formativas. Nela combínanse as clases teóricas e a posta en práctica dos coñecementos adquiridos na aula. Neste tipo de centros foméntase a educación colectiva e comunitaria e as prácticas realízanse in situ nos campos que a rodean. En Galicia é dastacable a Escola Agrícola da Granxa de Barreiros de Ortoá (Sarria, 1948).

Explotacións rurais dependentes dun mosteiro principal nas que residía unha pequena comunidade de monxes dedicada ás tarefas agrarias. En Galicia, sobre todo trala reforma do monacato do s XVI, os grandes mosteiros fixéronse con numerosas granxas que estaban rexidas por un prior ou por un encargado. A constitución deste tipo de establecementos non só permitiu cultivar terras ata aquel momento improdutivas, senón que potenciou a formación de pequenas vilas ou aldeas ao seu redor. Algunhas destas granxas chegaron a ter igrexa parroquial propia na que o párroco era designado polo mosteiro.