Guterre

Antropónimo masculino cunha orixe probablemente ibérica. Hai quen pensa que pode derivar de Guterus ou Guterius, que xa se documenta no s X, derivado talvez do xentilicio Gutus ‘godo’. Moi frecuente na Idade Media, presenta a variante Goter. A forma castelá Gutierre deu lugar ao apelido patronímico Gutiérrez. Destaca con este nome o conde galego (ss IX-X), pai de san Rosendo e esposo de santa Ilduara, e san Gautier (s XI), monxe bieito francés, fundador da abadía de Saint-Martin de Pontoise.