hidruro

Combinación do hidróxeno cun elemento, case sempre metálico. Os hidruros moleculares son substancias de enlace covalente de tipo B2H6, PH3, AsH3, que se obteñen ao facer reaccionar o hidróxeno atómico sobre o metal. Os hidruros empréganse como axentes redutores, como carburantes moi enerxéticos e como intermediarios de síntese, moitos dos que, sen embargo, teñen un interese exclusivamente teórico. Os hidruros de inserción son compostos obtidos facendo absorber o hidróxeno por certos elementos de transición, como o titanio (TiH2). Suponse que o hidróxeno se introduce nas fisuras intersticiais da malla metálica e modifica as súas propiedades.