Jena, Plan

Sistema educativo que ideou Peter Petersen e puxo en práctica en 1924 nun centro experimental anexo á facultade de Pedagoxía da Universidade de Jena (Alemaña). Segundo este sistema, a escola estaba concibida como unha escola-familia integrada por tres grupos de persoas (mestres, pais e alumnos) e organizada en réxime de autogoberno. O seu obxectivo era a educación segundo o método de traballo escolar por grupos de alumnos, que se formaban libremente atendendo ás afinidades extraescolares. Fúndase en dous principios básicos: a) a escola concibida como comunidade de traballo e vida; e b) sistema coeducacional durante un período escolar de dez anos.