limadora

Máquina ou ferramenta que se emprega no traballo dos metais para obter superficies planas cun grao de remate basto. A ferramenta de traballo consiste nunha uña dotada dun movemento alternativo horizontal, en sentido lonxitudinal. O arrincado do material prodúcese durante a carreira activa da ferramenta, mentres que a peza traballada ten o movemento de avance transversal. Segundo o tipo de transmisión do movemento ao carro portaferramentas, distínguense limadoras mecánicas e limadoras hidráulicas. Para pezas de grandes dimensións utilízase a limadora de ponte, na que a ferramenta fai o avance transversal, mentres que o desprazamento lonxitudinal é a cargo da táboa portapezas.