obsesión

Idea, palabra ou imaxe que se apodera da mente con persistencia.

Perturbación anímica que se produce por unha idea, palabra ou imaxe persistente que se impón con independencia da vontade e que só con dificultade pode ser eliminada da mente. Entre os diferente tipos están as intelectuais, as impulsivas e as inhibidoras. Acompañada de plena consciencia, a obsesión é propia de diversas neuroses e un dos síntomas da psicastenia. Para a psicanálise, a obsesión actúa como un mecanismo de defensa ao intentar afastar da conciencia o desexo inaceptable. Para os psicanalistas freudianos é unha regresión aos estados prexenitais.