parede

1. [CONSTR]
   1. s f

      Obra de fábrica relativamente ampla e de grosores diversos, que se levanta verticalmente e que serve para cerrar un espazo de terreo, para formar as caras laterais dunha casa ou dunha cámara, ou para soster a cuberta dunha construción.

   2. parede apiñonada

      Parede que remata en ángulo para soportar unha estrutura de cuberta a dúas augas.

   3. parede de carga

      Parede en que se apoian as trabes que forman a estrutura do chan.

   4. parede de tres cuartos

      Parede, menos grosa ca a parede medianeira, que se fai no interior das casas.

   5. parede medianeira

      Parede que pertence simultaneamente a dúas edificacións veciñas, baixo un réxime especial de indivisión que permite a cada propietario o seu aproveitamento ata a metade do seu grosor. OBS: Tamén se denomina medianeira e medianil.

   6. parede mestra

      Parede principal e máis grosa que nun edificio adoita soportar os arcos e as vigas.

2. s f

   Superficie ou cara lateral dun corpo.

3. [ANAT]
   1. s f

      Superficie que cerra ou limita unha cavidade ou un órgano.

   2. parede abdominal anterior

      Envoltura que circunscribe a cavidade abdominal anterior, lateralmente, desde o bordo inferior do tórax óseo e cartilaxinoso ata a cintura pelviana.

4. s f

   Corte vertical ou moi recto na cara dunha montaña.

5. s f [DEP]

   Pase do balón dun xogador a outro do seu mesmo equipo para que llo devolva deseguida salvando algún xogador contrario. OBS: Adoita empregarse na expresión facer a/unha parede.

6. parede celular [MICROB]

   Envoltura ríxida das células bacterianas que contén o protoplasma. Está constituída por polisacáridos, glicopéptidos, aminoácidos neutros e básicos, complexos glicerofosfóricos, proteínas, lipoproteínas e lípidos. A súa estrutura física dálle forma á bacteria e mantén a integridade do protoplasto, e permite a clasificación dos individuos segundo o resultado da tinguidura de Gram.

Frases feitas

• Achegarse á parede/Mollar a parede/Tirar a parede. Ouriñar o home.

• 2 Valerse alguén doutra persoa para levar unha cousa da que deriva dano, prexuízo ou desgusto.

• Achegarse/Arrimarse ás paredes. Ir bébedo.

• Dar couces contra a(s) parede(s). Estar ou amosarse desesperado ou arrepentido.

• De contra a parede/De a rente á parede. Aplícase ao viño especial, que é moi bo.

• Entre a espada e a parede. Nunha situación moi comprometida.

• Estar entre catro paredes. Estar encerrado e sen contacto coa xente.

• Estar/Ser máis xordo ca unha parede. Estar alguén moi xordo.

• Falar as paredes. Exisitir a posibilidade de que se descubran cousas secretas.

• Falarlle a unha parede. Dirixirse a alguén que parece non oír nin entender.

• Quitar/Sacar a cobra da parede coa man doutro/allea. 1 Facer algo que non é correcto, ou que está mal, e intentar encubrilo ou tapalo.