Pensado Tomé, Xosé Luís

  (Negreira 6.3.1924 - Salamanca 15.12.2000) Filólogo. Catedrático de Filoloxía Románica e Galego-portuguesa nas universidades de Oviedo (1957-1962) e Salamanca (1963-2000), foi discípulo de Dámaso Alonso. Como investigador centrou gran parte da súa produción na edición e estudo dos textos de Martín Sarmiento: Colección de voces y frases gallegas (1970), Catálogo de voces y frases de la lengua gallega (1973), Viaje a Galicia (1745) (1975), La educación de la juventud (1984), Catálogo de voces vulgares y en especial de voces gallegas de diferentes vegetables (1986), Elementos etimológicos según el método Euclides (1998) e Onomástico etimológico de la lengua gallega (1999), aínda que tamén editou e estudou a outros autores do s XVIII como Xoán Sobreira (Papeletas de un dicionario gallego, 1979)). Investigou varios aspectos do galego, tanto medieval coma moderno, sen esquecer outras linguas como o asturiano. Así, profundizou no estudo de textos medievais galegos (Miragres de Santiago, 1958; Fragmento de un “Livro de Tristán” galaico-portugués, 1962); na historiografía da lexicografía galega (Contribución a la crítica de la lexicografía gallega. Tomo I: El dicionario gallego-castellano de F. J. Rodríguez y su repercusión en la lexicografía gallega, 1976; Tradución de algunas voces, frases y locuciones gallegas, especialmente de agricultura, al castellano (1840-1858), 1995; realizou o estudo e edición da obra do bacharel Olea, Vocábulo[s] gallegos escuros: lo [que] quieran dezir, 2003; e Tratado de Albeitaria, 2004, con introdución, transcrición e glosario seus); na etimoloxía (Estudios etimológicos galaico-portugueses, 1965); e na lingüística (Opúsculos lingüísticos gallegos del siglo XVIII, 1974; Gueada y geada gallegas, 1983, en colaboración con C. Pensado Ruiz). Foi un asiduo colaborador de prensa con artigos lingüísticos e filolóxicos (sobre todo etimolóxicos e lexicográficos) e moitos deles foron publicados como El gallego, Galicia y los gallegos a través de los tiempos (1985) e Galicia en su lengua y sus gentes (1991). Foi membro correspondente da Real Academia Galega (19.11.1967), membro correspondente da Real Academia Española (17.3.1972), membro do Comité de Patronage des Cahiers de Linguistique Hispanique Médiévale de Paris (20.12.1979), membro do Instituto de Estudios Galegos Padre Sarmiento (18.12.1979), membro de honra da Academia de la Llingua Asturiana (22.1.1982) e académico de honra da Real Academia Galega (10.4.1984).