Pensamiento Galaico, El

Xornal publicado en Santiago de Compostela a partir do 2 de xaneiro de 1887. Subtitulado “Diario católico-tradicionalista”, substituíu a El Libredón e defendeu a causa carlista. Dirixido por M. Jamardo e posteriormente por Xoán Vázquez e Carlos Adrán, a publicación foi substituída a partir do 2 de xaneiro de 1897 por El Pensamiento Gallego. En 1900 saíu co título de El Pensamiento de Galicia, como continuador dos dous anteriores. Publicou artigos de dereito penal, historia ou relixión, ademais de folletíns, apartado en que se incluíron as novelas A tecedeira de Bonaval e O castelo de Pambre, de A. López Ferreiro. Imprimiuse nos obradoiros tipográficos de Alende.