peza

1. 1. s f

      Cada unha das partes que, xuntadas convenientemente unhas con outras, forman un obxecto.

      Ex: Desmontou o reloxo e agora sóbranlle pezas.

   2. peza anatómica [ANAT]

      Cada unha das partes dun cadáver preparada para os estudos anatómicos.

   3. peza polar [FÍS]

      Parte do circuíto magnético dunha máquina eléctrica situada entre a culata e o entreferro, que comprende o núcleo e, eventualmente, a expansión polar.

2. s f

   1. Obxecto ou elemento independente que forma parte dun conxunto.

      Ex: Regaláronlle unha vaixela de vinte e seis pezas. Colleu as pezas do xadrez para botar unha partida.

   2. Obxecto interesante ou precioso coleccionable ou que forma parte dunha colección.

      Ex: Eses torques celtas son pezas de museo.

3. s f

   Cousa ou produto concibido como parte doutros da mesma especie.

   Ex: Trouxo dúas pezas de pan e tres pezas de mazás.

4. s f

   1. Calquera dos elementos que constitúe unha vestimenta.

      Ex: Foi ver se compraba algunha peza de roupa.

   2. Anaco de tea, coiro ou outro material, que se cose a unha peza de roupa para reforzala ou taparlle algún roto.

      Ex: Botoulle unha peza á chaqueta porque xa a tiña gastada nos cóbados.

      Sinónimos: remendo, tomba.

   3. Porción de tecido.

      Ex: Fixo o vestido cunha peza de liño.

5. s f

   Cada unha das dependencias en que está dividida unha casa.

   Ex: Esta peza da casa é moi húmida.

6. s f

   Porción dunha terra de labor.

7. s f

   Animal que se caza ou pesca.

8. s f

   Obra musical ou teatral, especialmente cando é breve.

9. s f [BÉL]

   Arma de fogo non portátil, especialmente de artillaría.

10. s f [NUMIS]

    Designación dunha moeda con relación ao seu valor nominal.

11. s f

    Espazo de tempo que lle corresponde a alguén para regar unha leira ou para usar o muíño.

12. s f [HERÁLD]

    Clase de carga heráldica que se representa nun escudo de armas. Son representacións xeométricas que ocupan sempre o mesmo lugar no campo do escudo. Aínda que non hai consenso entre os heraldistas, a clasificación máis difundida e tradicional divide as pezas en: pezas honorables ou de primeira orde, pezas honorables diminuídas e pezas de segunda orde. As pezas honorables ou de primeira orde xeralmente admitidas son o xefe, o pau, a faixa, a banda, a barra, a cruz, a aspa, a cabria, o bordo, a orla, a perla, a campaña, o xirón, a pira, o trechor, o cantón, o franco cuartel e o lambel. As pezas honorables diminuídas, que derivan da variación das proporcións das pezas honorables, son a vara, a divisa, a burela, a xemelga, a cotiza, o bastón, a filieira, o lazo e as tenaces. As pezas de segunda orde son as plumas, os puntos equipolados, o xadrez, os fretes, os losanxes, os fusos, os besantes, os roeis, as mallas, os rustros, os billetes, os aneliños, os danteis e o papelonado.

13. s f

    Persoa que se comporta de malas maneiras ou que ten malos costumes.

    Ex: Éche unha boa peza ese teu fillo!

Frases feitas

• Non soltar peza. Non dicir nada daquilo que lle interesa saber a outras persoas.

• Ser unha boa peza. Non ser unha persoa de fiar.