² pilro

Ave da familia dos escolopácidos, a maioría do xénero Calidris, de patas longas, peteiro fino e medianamente longo, dorso coloreado e ventre claro. Aliméntanse de crustáceos e doutros invertebrados e poden verse en areais litorais.

Ave de 20 cm, sen dimorfismo sexual, que presenta dous tipos de plumaxe, un estival de peito e dorso arrubiado e outro invernal co dorso de tons grises moi claros e o peito branco. Vive en areais litorais e zonas intermareais. En Galicia pode verse como invernante e en paso pre e posnupcial.

Ave de 21 cm de lonxitude, sen dimorfismo sexual, que presenta dous tipos de plumaxe, un invernal co peito e o dorso gris escuro e o ventre claro, e outro estival, máis claro e con pencas. O peteiro ten a punta negra e o resto é amarelo, ao igual que as patas. Vive na beiramar e aliméntase de pequenos invertebrados. En Galicia é invernante e tamén pode verse en paso.

Ave de ata 19 cm de lonxitude que presenta a plumaxe invernal cincenta polo dorso e branca polo ventre, e a estival de cor ferruxenta, coas ás pencadas de negro. Vive en areais e marismas, alimentándose de moluscos e vermes. Distribúese pola zona siberiana, pero en Galicia pode verse de paso cara a África.

Ave de aproximadamente 18 cm de lonxitude, sen dimorfismo sexual, que presenta diferenzas na plumaxe segundo sexa invernal ou estival; no primeiro caso ten o dorso cincento e pardo, con manchas máis escuras, e o ventre branco; no segundo caso, o dorso é acastañado con manchas, e o ventre branco cunha gran mancha escura. Habita en marismas e areais, e distribúese polas costas de toda Galicia, onde está presente todo o ano.

Ave de ata 14 cm de lonxitude, que presenta plumaxe invernal cincenta no dorso e branca no ventre, mentres que a estival é parda onde antes era cincenta. Vive en marismas e lagoas do interior, alimentándose de insectos. Pode localizarse no N de Europa, e como invernante no Mediterráneo.

Ave de 25 cm de lonxitude, sen diferenzas entre sexos, que presenta plumaxe estival arrubiada, e o dorso pardo vermello e o invernal gris, máis claro no peito e no ventre ca no dorso. Habita en areais e marismas, e en Galicia pode verse como invernante ou en paso na costa.

Ave de case 24 cm de lonxitude, sen dimorfismo sexual, que presenta plumaxe variable segundo sexa invernal ou estival. No primeiro caso, o dorso é cincento, e no segundo pardo, pero en ambos os dous o ventre e o peito son brancos. Vive en esteiros e aliméntase de moluscos, crustáceos, insectos e vermes. De distribución paleártica, en Galicia pode verse, escasamente, como ave de paso ou como invernante nas costas.