Pío

Antropónimo de orixe latina procedente de pius, co significado de ‘cumpridor do seu deber cos parentes e cos deuses’ ou ‘piadoso’. Trátase dun nome que se estendeu de forma xeral pola curia eclesiástica, especialmente como nome adoptado polos papas, ata un total de doce, dos que destacan Pío II (1458-1464), san Pío V (1566-1572), Pío VI (1775-1779), Pío VII (1800-1823), Pío IX (1846-1878), San Pío X (1903-1914), Pío XI (1922-1939) e Pío XII (1939-1958). Na súa iconografía viste de pontifical, cun cáliz e espada, agás san Pío V que leva un crucifixo de man cos pés descravados da cruz e retirados a un lado, e mais un rosario nos dedos. A súa festa celébrase o 30 de abril (Pío V), o 11 de xullo (Pío I) ou o 21 de agosto (Pío X).