pobre

1. 1. adx e s

      Que ou quen ten poucos bens.

      Ex: Son xente pobre pero honrada.

   2. adx

      Que conta con recursos insuficientes.

      Ex: No cumio tamén estaban representados os paises pobres.

   3. adx e s

      Que ou quen é de baixa condición social.

   4. s

      Persoa que vive da caridade.

      Sinónimos: indixente, mendigo.
2. adx

   Que ten algo de xeito escaso.

   Ex: Son terras moi pobres. Era un libro pobre en recursos. É un mineral pobre en ferro.

3. adx

   Que dá pena. OBS: Adoita ir anteposto ao nome.

   Ex: Pobre animaliño! É un pobre home!

4. [RELIX]
   1. s

      Membro dunha congregación relixiosa ou seita que adoptaron esta denominación para subliñar a súa condición de pobreza e, sobre todo, a súa adhesión ao espírito da pobreza evanxélica. Entre eles foron especialmente coñecidos os valdenses, que en Francia foron chamados pobres de Lyon e en Italia pobres lombardos.

   2. pobre católico

      Membro da comunidade relixiosa fundada en 1208 por Durando de Huesca con antigos valdenses convertidos. O Papa Inocencio III aprobou as súas regras en 1212: pobreza absoluta ata a mendicidade, castidade, predicación contra os herexes, oficio canónico e submisión á xerarquía eclesiástica. Establecéronse basicamente na diocese de Elna e en Occitania e disolvéronse a partir de 1250 tras a morte do seu fundador.

5. arte pobre [ARTE]

   Utilización estética dunha certa clase de obxectos extraídos do uso da vida cotiá, cunha finalidade dominantemente estética.

6. pobre de espírito
   1. [RELIX]

      Persoa consciente da propia insuficiencia que espera todo de Deus. A súa felicidade non lle vén do feito de ser pobre, senón do feito de que deixará de selo coa chegada do Reino de Deus.

   2. Persoa que é demasiado inxenua ou pusilánime.

7. pobre de Iavé [RELIX]

   Aplícase a toda persoa desafortunada, enferma ou indefensa, segundo a Biblia, como o inmigrante, o orfo, a viúva ou o oprimido. Nas benaventuranzas son os privilexiados do Reino de Deus.

8. Natural ou habitante dos lugares que teñen na súa denominación o termo A Pobra.

Frases feitas

• Pobre de (ti, el...)! Expresa ameaza. Ex: Pobre del como non coma o caldo!

• Meu pobre/pobriño. Expresión coa que se manifesta pena por alguén, ás veces con intención despectiva. Ex: Meu pobre pensa que é o máis listo do mundo!

Refráns

• A pobreza non é baixeza, pero tampouco é grandeza.
• A pobreza non é vileza, senón falta de riqueza.
• A pobreza non lixa.
• Canto máis pobre, menos esmola.
• Na casa do pobre, cunca de pau e pucheiro de cobre.
• Nai vella e camisa rota non é deshonra.
• Non hai para pan e mercamos rosquillas.
• Non temos para pan e mantemos un can.
• Ó pobre ata os cans lle ladran.
• Ó pobre dálle a metade do que che sobre.
• Ó pobre e á nogueira todos lle tiran pedras.
• Ó pobre e ao minguado non falta quen o faga máis necesitado.
• Ó pobre farto de carne non hai quen o ature.
• O pobre non vai ao concello nin se toma o seu consello.
• O pobre que con carne se entupe non hai quen o ature.
• Ó que é pobre ninguén lle fai caso.
• O ser pobre non deshonra.
• Onde non hai pan vaise ata o can.
• Quen di que pobreza é vileza, non sabe o que di nin ten siso na cabeza, inda que teña moita riqueza.
• Ser pobre non deshonra a ningún home.
• Ser pobre non é deshonra.
• Todos foxen do pobre coma dunha enfermidade.
• Tras do pobre todo o mundo corre.
• Vivimos como podemos e non como queremos.