porco de pé, O

Novela de Vicente Risco publicada en 1928, coa que contribuíu a impulsar a narrativa galega cara á modernidade. O autor busca a cooperación do lector a través da voz narrativa nun texto de carácter intelectual. A novela, ambientada na vila de Oria -Ourense na realidade-, posúe trazos definitorios da ideoloxía de Risco. O protagonista, don Celidonio, o porco, e o antagonista, o doutor Alveiros, representan, respectivamente, a materia e o espírito. Nela tamén se atacan os valores da cultura urbana e do ser capitalista, que prexudican directamente, no presente e no futuro, os valores tradicionais galegos. Ademais cómpre destacar o bo uso do carácter satírico que, partindo da longa tradición da literatura galega, fai o autor nesta obra. Nese sentido, e seguindo os preceptos do grupo Nós, Risco alimentou un dos aspectos fundamentais do volksgeist galego: o humor.