Puebla de Parga, marquesado da

Título nobiliario concedido polo Rei Carlos II en 1679 a Xosé de Bolaño Ribadeneira e Mariñas , señor da Puebla de Parga e das fortalezas de Torés e Xunqueiras, entre outras. A súa filla e herdeira, María Xosefa Rosa Bolaño Ribadeneira foi a II marquesa e casou con Tomé de los Cobos Sarmiento de Mendoza, capitán xeneral do Reino de Galicia e fillo do X conde de Ribadavia. A súa filla María Xosefa de los Cobos Bolaño Ribadeneira (?-Madrid 1767), foi a III marquesa e casou con Fernando Gayoso Arias y Ozores, III conde de Amarante e vizconde de Oca. O seu fillo Domingo Gayoso de los Cobos y Bolaño Ribadeneira (?-1803), foi o IV marqués e herdou tamén os títulos paternos e os de conde de Ribadavia (XIV), marqués de Camarasa (VIII), con Grandeza de España, e conde de Ricla. Desde entón o marquesado seguiu a mesma liña sucesoria que o condado de Ribadavia ata 1871: Joaquín Gayoso de los Cobos (?-1849), V marqués da Puebla de Parga e XV conde de Ribadavia; Francisco Gayoso de los Cobos y Téllez Girón (1805-1860), VI marqués da Puebla de Parga e XVI conde de Ribadavia; e Jacobo Gayoso de los Cobos (?-1871), VII marqués da Puebla de Parga e XVII conde de Ribadavia. Cando morreu sucedeuno no marquesado a súa filla Francisca de Borja Gayoso de los Cobos y Sevilla , que casou con Ignacio Fernández de Henestrosa y Ortiz de Mioño, conde de Moriana e marqués de Cilleruelo. En 1912 sucedeuna María Rafaela Fernández de Henestrosa y Gayoso de los Cobos (?-Donostia 1979), IX marquesa, que casou con Ricardo de la Huerta Avial. En 1956 cedeulle o título ao seu fillo, Ignacio de la Huerta y Fernández de Henestrosa (?-2002?), X marqués, que cando morreu foi sucedido polo seu fillo, Álvaro de la Huerta y Ozores , XI marqués.