Progreso, El

Xornal publicado en Pontevedra a partir do 6 de outubro de 1907. Cesou non antes de 1937. Subtitulouse orixinalmente “Semanario independente”. Fundado e dirixido por Isidro Buceta, definiuse como católico para, a partir de 1912, subtitularse “Diario independente” e facerse eco das opinións do Partido Liberal, seguindo as teses de U. Montero Ríos. A partir de 1916, Buceta foi substituído por Benigno Barros, quen iniciou unha dura campaña contra os riestristas, coincidindo coas disputas entre estes e os monteristas. Mantivo simpatías coas tendencias moderadas do movemento agrarista e, desde 1921, funcionou como voceiro do Partido Reformista de Pontevedra. Na súa última etapa foi dirixido por Roberto Blanco Torres.