Sandoval

Familia nobre de Castela que tomou o seu nome do señorío de Sandoval, preto de Burgos. Dos seus membros destacaron Diego Gómez de Sandoval y Rojas (?-1454), primeiro conde de Castrojeriz e adiantado maior de Castela; Francisco Gómez de Sandoval y Rojas (1553-1625), valido de Filipe III, primeiro duque de Lerma; e Cristóbal Gómez de Sandoval y de la Cerda (?-1624), valido de Filipe III e primeiro duque de Uceda. O seu escudo trae por armas, en campo de ouro, unha banda de sable.