saúde

1. [MED]
   1. s f

      Estado en que o organismo, libre de enfermidades, exerce de xeito normal todas as súas funcións.

   2. saúde pública

      Arte e ciencia de organizar e dirixir esforzos da comunidade, coa intención de previr, recuperar e rehabilitar o individuo e obter un óptimo nivel de saúde.

2. s f

   Estado físico e psíquico en que se atopa unha persoa nun determinado momento.

3. s f

   Bo estado ou funcionamento do que goza unha colectividade, entidade ou cousa abstracta.

4. interx

   Exclamación que se utiliza para brindar por alguén.

5. interx

   Exclamación que se utiliza cando esbirra alguén.

Refráns

• A home sano, culler de pau.
• A moita saúde non é virtude.
• A saúde é a riqueza dos pobres.
• A saúde non e coñecida ata que é perdida.
• Bo tesouro ten o que está de saúde ben.
• Boa mexada, boa cor e tres figas ao doutor.
• Cagar ben e mexar claro e cagallón para o "cirurxiano".
• Cando bos estamos, dos enfermos non nos lembramos.
• Cartas de ausentes son sinais de saúde.
• Co que sana o fígado, enferma a bulsa.
• Come forte, durme forte, caga forte e non teñas medo á morte.
• Corpo que moito se cura pouco dura.
• Dálle tres figas á morte, se mexas claro, cagas duro e peideas forte.
• Deus, que dá o mal, dá o remedio para sanar.
• En comendo moito e en mexando claro, non fagas caso do "cirurxiano".
• En mexando claro, dálle unha figa ao médico e outra ao "cirurxiano".
• Máis vale a saúde có diñeiro.
• Mexa limpo, mexa claro e figa ao cirurxiano.
• Moita parte da saúde e coñecer a enfermidade.
• Mozo é o vello que está sano; e vello é o mozo que está escrequenado.
• O mellor da saúde é cobizala.
• O san ao doente en regra o mete.
• Para pouca saúde vale máis ningunha.
• Pes quentes, cabeza fría.
• Saúde e alegría fermosura cría.
• Se queres criarte gordo e san, a roupa do inverno pona no verán.
• Se queres vivir san, anda abrigado, come pouco e durme en alto.
• Se queres vivir san, faite vello cedo.
• Tarde chega a vello o que de mozo vive como vello.
• Tendo saúde e comendo ben, o traballo non mata a ninguén.
• ¡Déanos Deus saúde: irémola andando!
• ¡Deus nos dea saúde para ir vivindo!
• ¡Haxa saúde e diñeiro, que non faltará humor e compañeiro!