trevo

1. [PLANTA]
   1. s m

      Planta herbácea anual e perenne, que pertence ao xénero Trifolium, da familia das fabáceas, con follas trifoliadas, flores rosadas, brancas ou amarelas reunidas en glomérulos ou en acios densos, e froitos secos, pequenos e ordinariamente indehiscentes. Son excelentes plantas forraxeiras.

   2. trevo branco [Trifolium occidentale, Fam das fabáceas]

      Planta herbácea perenne, con talos rastreiros, follas divididas en tres folíolos orbiculares, flores de cor branca rosada dispostas en capítulos e froito en legume. Florece a mediados da primavera e principios do verán, en dunas e zonas preto do mar.

   3. trevo rubio [Trifolium pratense, Fam das fabáceas]

      Planta herbácea perenne, de ata 100 cm de altura, con varios talos que brotan dunha mesma raíz e follas pecioladas con tres folíolos estreitos, ovais ou obovados, a miúdo con manchas claras cara á base. As flores dispóñense en capítulos terminais de cor rosada e froito en legume. Florece a mediados da primavera e finais do verán. É moi frecuente en toda Galicia e emprégase como planta medicinal.

2. s m [XOGO]

   1. Pau da baralla francesa que se caracteriza polos trevos que leva gravados.

   2. Carta deste pau.

3. trevo acedo [PLANTA]

   pan do cuco.

4. trevo de auga/das pozas [PLANTA]

   Planta acuática vivaz, de ata 30 cm de altura, con talos subacuáticos e reptantes, follas pecioladas e divididas en tres folíolos obovados, flores de cor branca ou rosada dispostas en acios terminais e froito globular. Florece na primavera en brañas e lugares con moita auga. Emprégase como planta medicinal polas súas propiedades tónicas.

Formas incorrectas