turbina

Motor rotativo que transforma a enerxía cinética, potencial, interna ou de presión dun fluído en enerxía mecánica. Segundo a natureza do fluído que se emprega existen tres tipos fundamentais de turbinas: as hidráulicas, as de gas e as de vapor. As turbinas hidráulicas son motores atérmicos mediante os que se transfire e se transforma a enerxía potencial da auga nun traballo útil. Poden ser clasificadas, segundo a dirección en que chega a auga, en turbinas radiais (centrífugas ou centrípetas), turbinas axiais e turbinas tanxenciais; segundo como actúa a auga, en turbinas de acción e de reacción. As turbinas de gas son motores endotérmicos que están constituídos polo xerador de gas e o elemento produtor de traballo útil. As turbinas de vapor son motores exotérmicos que están constituídos por un xerador de vapor (caldeira), a turbina propiamente dita, un condensador e o equipo de bombeo que opera en circuíto cerrado.