tutela

Poder outorgado pola lei a persoas determinadas (titores) que ten como obxecto a protección e defensa dos menores de idade orfos e dos incapacitados e do seu patrimonio. É un cargo de dereito privado que é de exercicio obrigatorio e gratuíto. As funcións do titor son as de tomar cargo do incapacitado e da súa educación e protección xerais, así como da súa representación en todos os actos civís e administrativos que poidan afectar á súa persoa e aos seus bens. A tutela pode ser testamentaria (cando no testamento dos pais xa está determinada a persoa que debe ocupar o cargo de titor para un menor ou posible incapaz), lexítima (cando, carecendo de testamento, a lei establece a persoa do titor) e dativa (cando o nomeamento está feito polo xuíz, porque non existen os parentes ou persoas que a lei prevé para o cargo).

Protección ou defensa de algo ou alguén.

Sistema de goberno ao que se somete un territorio, baixo as directrices dunha potencia administradora, ata que este estea en condicións de autogobernarse. Este termo xurídico, creado pola ONU, foi a prórroga do antigo mandato sobre as colonias das potencias vencidas confiada pola Sociedade de Nacións aos vencedores.