Utah

Estado de EE UU que limita ao N cos estados de Idaho e Wyoming e ao L con Nevada (219.889 km2; 2.233.169 h [2000]). A súa capital é Salt Lake City. Divídese en tres grandes rexións: o sector oriental, que forma parte do altiplano de Colorado; o sector occidental, que se corresponde co Gran Canón do Colorado e onde se atopa o Gran Lago Salgado e, no centro, as montañas Wasatch, con alturas superiores aos 4.000 m. O clima, frío nas montañas, é subdesértico no resto do territorio. As principais cidades son Salt Lake City, Provo, Ogden e Orem. A agricultura é de regadío e produce cereais, patacas, remolachas, forraxe e froita. A principal actividade económica é a explotación de minerais como cobre, petróleo, ouro, prata, cinc ou chumbo. En 1847 os mormóns establecéronse no estado, dirixidos por Brigham Young e fundaron Salt Lake City. Convertido en territorio da Unión (1848), os conflitos provocados pola chegada de colonos non mormóns orixinaron a intervención do goberno federal e o desencadeamento da Guerra de Utah (1857-1858). En 1896 converteuse en estado da Unión.