vianés -sa

Relativo ou pertencente a Viana do Bolo ou aos seus habitantes.

Natural ou habitante de Viana do Bolo.

Raza bovina autóctona de Galicia, que se localiza na comarca de Terra do Bolo. Está formada por animais de perfil recto a subcóncavo. O seu peso medio é de 560 kg nas femias e de 850 kg nos machos e a altura media na cruz é de 132 cm nas femias e de 138 cm nos machos. A cabeza é pequena, coa cara alongada e estreita no fociño; as orellas grandes e peludas e os cornos en gancho curto nos machos, e alongados nas femias. A pelaxe é castaña, con tonos máis escuros nos bois e máis claros nos tenreiros. Caracterízase pola  rusticidade, que lle permite unha boa adaptación ao medio montañoso, e pola excelente calidade organoléptica da carne dos seus tenreiros. A busca por parte dos gandeiros de maiores rendementos fixo que se potenciaran razas máis especializadas, o que puxo en perigo a pureza da raza. Co obxectivo de recuperar, conservar e fomentala, no ano 2000 aprobouse a regulamentación específica do Libro Xenealóxico da Raza Bovina Vianesa.