Vilar Lamelas, Alfonso

(Vilalonga, Sanxenxo 1927) Escultor. Formouse no taller de carpintaría do seu pai e con Francisco Asorey. En Madrid realizou estudos na Escuela de Bellas Artes de San Fernando. Realizou diversos monumentos públicos nos que reflectiu os tipos galegos, principalmente campesiños e mariñeiros, destacando neles os seus trazos fisionómicos máis característicos. As súas obras caracterízanse tamén pola ausencia do oco, pola concepción do volume como masa e polo emprego dos esquemas piramidais. Destacan as súas obras, Monumento ao pescador (Vigo, 1954), A muller do emigrante (Marín, 1959), Mariscadores (O Grove, 1972), Monumento ao príncipe de Asturias (Marín, 1986), Castelao (Redondela, 1987) e A serea de Silgar (Sanxenxo, 1995).