Xil

Antropónimo masculino que procede do francés Gilles, do latín tardío Aegidius, testemuñado a partir do s V e probablemente de orixe grega. Para algúns vén do grego aigidion ‘cabuxo’, diminutivo de aíx, aigós ‘cabra’, mentres que para outros pode provir do grego aigis ‘tempestade’ ou de aigidos ‘escudo’. Outra hipótese faino proceder de Aigidion, ‘fillo do Exeo’. Presenta a variante Exidio.

Apelido que trae por armas, en campo de goles, unha torre de prata, aclarada de sable, sinistrada de ouro de oito raios, mal ordenados, torre e león sostidos de ondas de prata e azul na punta. Outra variante trae, en campo de azur, unha torre de ouro, superada de tres flores de lis, do mesmo, colocadas en faixa e surmontada a do medio dunha cruz grega de ouro. Outra, de ouro, con dous leóns de azul, afrontados e surmontados de tres crecentes de goles, ranversados, colocados en faixa en xefe. Outra, de azul, con tres faixas de prata. Outra, de prata, cunha aciñeira de sinople superada dun luceiro de ouro no centro do xefe. Outra, de prata, con dous leóns da súa cor, colocados en pau, bordo de azul, cargado de oito crecentes de prata. Outra, de prata, con cinco estrelas de azul, colocadas en aspa. Outra, de azul, cun castelo de ouro mazonado de sable, acompañado de dúas estrelas de ouro, unha en cada cantón do xefe. Outra, de goles, cun castelo de ouro, sostido de ondas de prata e azul, na punta. Outra, de sinople, cun castelo de pedra da súa cor, aclarado de sable, acompañado no cantón sinistro do xefe de tres estrelas de ouro mal ordenadas. Outra, de sinople, cun castelo de pedra, mazonado de sable, superado dunha estrela de ouro en cada unha das torres, mal ordenadas, adestrado dun león de ouro, contornado, empinado a el, e sostidos torre e león de ondas de prata e azul na punta. Outra, de sinople, unha faixa de ouro acompañada, no alto, de tres cruces gregas de ouro, colocadas en faixa, e no baixo, de tres escudiños de ouro cargados cada un de tres faixas de azul, bordo de goles, cargado de oito aspas de ouro. Outros traen escudo partido: 1, en campo de ouro, catro paus de goles; 2, en campo de azur, unha árbore de ouro. Outros traen escudo cuartelado: 1 e 4, en campo de sinople, unha casa unida pola destra cunha torre, todo de prata; 2 e 3, de ouro, cunha banda de goles; bordo de prata cargado de oito aspas de ouro (en contra das leis heráldicas). Presenta a variante Gil.