xosa

Relativo ou pertencente ao pobo xosa ou á súa lingua.

Individuo do pobo xosa.

Conxunto de tribos pertencentes ao grupo meridional dos nguni de lingua bantú, que habitan entre as concas do río Kei e do Great Fish, ata a costa do Océano Índico, na provincia do Cabo (República Surafricana). As tribos máis importantes son os gcaleka, ngqita, ndlamba, dushane, qayi e gqunkhwebe. Pobo agricultor e gandeiro, organízase en clans patrilineais, unidos polos seus xefes á tribo dirixida polo xefe do clan principal.

Lingua bantú do phylum níxer-congo que fala o pobo xosa. A súa semellanza co zulú fai que se consideren un único idioma, o xosa-zulú, aínda que os autóctonos os consideren idiomas diferentes.