Xúpiter

Quinto planeta do sistema solar segundo a súa proximidade ao Sol, e o de maior tamaño. A súa masa é máis do dobre da suma das masas de todos os outros planetas, e o seu diámetro é dez veces superior ao da Terra. Visto polo telescopio, presenta un conxunto de franxas alternativamente claras e escuras paralelas ao ecuador, ademais dunha formación oval de cor vermella denominada a gran mancha vermella. A cantidade de enerxía que radia ao espazo é dúas ou tres veces superior a que recibe do Sol e a emision de radiacións electromagnéticas fai del a segunda radiofonte do sistema solar despois do Sol. A súa atmosfera, estudada polas sondas Pioneer 10 e 11 (1973 e 1974) e Voyager 1 e 2 (1979), ten unha estrutura moi complexa; por debaixo da envoltura nebulosa hai un paso gradual do gas a unha mestura líquida de hidróxeno e helio, máis abaixo hai unha transición súpeta a hidróxeno líquido metálico e no centro podería haber un pequeno núcleo de xeo e rocha. Ten como mínimo 15 satélites, dos que destacan Ión, Europa, Ganímedes e Calisto.