¹ mundo

1. s m

   Conxunto de todas as cousas e os seres que teñen existencia material, en contraposición co divino.

   Confrontacións: orbe, universo.
2. 1. s m

      Planeta Terra.

   2. s m

      Parte ou rexión da Terra.

   3. vello mundo/ [XEOG/HIST]

      Conxunto dos territorios coñecidos antes do descubrimento de América, formado por Europa, Asia e parte de África.

   4. novo mundo/ [XEOG/HIST]

      novo continente.

3. s m

   Calquera planeta ou corpo celeste, especialmente considerado como hábitat.

4. s m

   1. Conxunto da sociedade humana.

   2. Sociedade humana considerada dentro dun tempo ou dun espazo.

5. s m

   1. Parte da sociedade humana caracterizada por algunha calidade común a todos os seus individuos.

   2. Conxunto de cousas que teñen unha característica en común que as diferencia doutras.

6. s m

   Conxunto de circunstancias, actividades e relacións sociais que rodean a vida dunha persoa.

   Sinónimos: universo.
7. s m

   Experiencia no trato e nas relacións sociais.

8. s m

   Territorio ou ambiente afastado ou descoñecido.

9. s m [RELIX]

   1. Aquilo que concerne aos intereses terreais en oposición ás cousas do espírito.

   2. Un dos tres inimigos da alma segundo o catecismo tradicional, entendido como a representación das delicias e as vaidades terreais.

10. [XEOG/ECON]
    1. primeiro mundo

       Termo que se emprega para designar o conxunto de países de desenvolvemento económico elevado, en contraposición ao denominado terceiro mundo. Fai referencia a variables socioeconómicas como a alta renda per capita, infraestrutura sanitaria, elevado nivel de instrución, industrialización desenvolvida e dispoñibilidade de enerxía.

    2. terceiro mundo

       Termo que se emprega para referirse ao conxunto de países sometidos a condicións de subdesenvolvemento. Os trazos fundamentais para identificar estes son a baixa renda per capita, insuficiencia alimentaria, estado sanitario defectuoso, baixo nivel de instrución, industrialización reducida, consumo feble de enerxía mecánica, niveis de subocupación importantes e debilidade da integración nacional.

Frases feitas

• Ter/De mundo. Ser moi experimentado. Ex: É unha muller de mundo que non se sorprende facilmente.

• Un mundo de. Moitísimo, gran cantidade de algo. Ex: Ten un mundo de libros.