afumado -da

de afumar.

Que está cheio ou cuberto de fume.

Que é da cor do fume.

Que cheira ou sabe a fume, especialmente as comidas.

Que está incomodado.

Que está medio borracho 

Sistema de conservación moi antigo, que consiste en expoñer á acción do fume determinados alimentos enteiros ou en filetes, previamente salgados. Segundo o Código Alimentario consiste en someter os alimentos á acción dos produtos procedentes da combustión incompleta de madeiras autorizadas, que poden ser mesturadas en diferentes proporcións con plantas aromáticas inofensivas. A calidade dos afumados depende da calidade da materia prima, do tipo de madeira empregada para producir o fume e da técnica empregada. Existen dous sistemas de afumado: a baixa temperatura (de 20°C a 23°C) e en quente (chegando a alcanzar os 80°C). A práctica do afumado está cada día máis difundida, grazas a que van aparecendo no mercado equipos que ocupan pouco espazo e que poden instalarse en calquera sitio. Este sistema aplícase principalmente en peixes como o salmón, a anguía, o arenque, a anchoa ou a castañeta. Antes do afumado o peixe require ser secado co fume da madeira verde de loureiro. O seguinte paso consiste en someter o peixe a un breve proceso de moureado para logo ser pendurado polos ollos e colgado na lareira durante un período de vinte ou trinta días, co fin de secalo e afumalo. Noutros procesos o moureado realizábase despois do afumado. En Galicia o afumado é unha práctica propia dos últimos meses do ano, cando o peixe está en sazón. Existiu, e aínda existe, unha gran variedade de formas de preparar e conservar o peixe: escabechado, ao espárrago, curado, en aceite, lañado, etc. Tamén determinados tipos de carnes, aves e embutidos poden ser afumados. En Galicia faise o afumado do San Simón, un dos poucos queixos que se someten a este procedemento, e cobra especial importancia a cacheira de porco afumada, definitoria da gastronomía do entroido.