Agazzi, método

Método pedagóxico para párvulos creado polas irmás Agazzi, mestras italianas. Baséase na actividade, a liberdade e a responsabilidade do neno, así como no traballo e na observación dos elementos do seu medio natural. O método estrutúrase a partir das actividades diarias do neno (lavarse, vestirse, comer, xogar, etc) e despreocúpase da lectura e escritura, para orientar o neno cara ao coñecemento do maior número de obxectos que emprega a cotío. Así mesmo, desenvolve a linguaxe por medio de numerosas conversas sobre estes obxectos, salienta a importancia da orde, da música e do canto.