alimentador -ra

Aparello ou sistema que fornece a enerxía que cómpre para o funcionamento dos dispositivos electrónicos nas diferentes tensións nas que traballa cada circuíto. Nun aparello previsto para a corrente alterna, está formado polo transformador, o rectificador e o filtro.

alimentador estabilizado Alimentador provisto dun estabilizador capaz de fornecer a tensión ou a intensidade cun valor constante.

alimentador universal Alimentador capaz de funcionar indistintamente con corrente alterna ou continua.

Dispositivo utilizado para introducir unha substancia, en réxime continuo ou intermitente, nun aparello industrial onde ten lugar unha operación ou un proceso. Cando se trata de líquidos, o sistema pode ser un sinxelo recipiente provisto dun sumidoiro ou doutro dispositivo de nivel constante. Para a alimentación de sólidos ou pastas, é moi frecuente o uso dun parafuso de Arquímides, o cal permite unha dosificación gradual e continua. Para os produtos pulverulentos empréganse depósitos en forma de embude e planos inclinados. Tamén se denomina alimentador ao conxunto de mecanismos empregados para transportar a alimentación: cadeas sen fin, cintas transportadoras, elevadores e conducións, entre outros.

alimentador automático Alimentador que, conectado mediante un dispositivo axeitado á máquina alimentada, é detido ou posto en marcha segundo as necesidades de fornecemento da máquina.