anticristo

Segundo a Biblia, é o inimigo por antonomasia de Cristo, así como o perseguidor do Cristianismo máis decidido que aparecerá pouco antes da fin do mundo. A figura do Anticristo aparece no Antigo Testamento, onde algúns autores, sobre todo Ezequiel e Daniel, describiron personaxes históricos ou imaxinarios, inimigos de Deus e do pobo xudeu. No Novo Testamento, Paulo e Xoán falaron dun sedutor ou impostor que fai apostatar os crentes, Xoán foi o primeiro en denominalo anticristo. O anticristo por excelencia presentarase na fin do mundo, e o mesmo Cristo, axudado polo arcanxo san Miguel, aniquilarao no momento da parusía. A figura do anticristo empregouse en varias épocas da historia, coincidindo con crises políticas e relixiosas, por visionarios de todo tipo. O maxisterio da Igrexa non se pronunciou sobre a natureza do anticristo, feito polo que algúns eséxetas argumentan que será unha persoa e outros que se tratará dunha colectividade.