auganeira

Mamífero insectívoro de costumes anfibios, duns 25 cm de lonxitude dos que arredor de 15 corresponden á cola. Posúe unha pequena trompa aplanada dorsoventralmente, rodeada de pelos e cun órgano especial no extremo, o órgano de Eimer, para detectar o movemento baixo a auga e, xa que logo, as posibles presas. Nas patas posteriores, máis desenvolvidas ca as dianteiras, ten unha membrana entre os dedos, fundamental para mergullarse. Segrega unha substancia semellante ao almiscre, que lle serve para impermeabilizar o pelame. Fai o niño en ocos naturais nas ribeiras dos ríos e aliméntase de pequenos crustáceos, moluscos, larvas de insectos e algún peixe de pequeno tamaño. É un endemismo ibérico e vive no terzo norte da Península Ibérica (principalmente Pireneos, Cordilleira Cantábrica e Galicia) onde prefire as partes altas dos cursos fluviais, de augas rápidas non contaminadas e fondos con grandes coios. A súa pel seca empregábase tradicionalmente como repelente da couza nos roupeiros.