bicheiro

Aparello de pesca formado por un mango cilíndrico de madeira, cunha lonxitude aproximada dun metro e 50 centímetros, cun ou varios ganchos en forma de anzol. Este útil de pesca emprégase, fundamentalmente, para a captura do polbo e mesmo do congro. Xeralmente se utiliza como un aparello de pesca a pé, aínda que tamén se pode usar desde unha embarcación. A forma de traballar co bicheiro é moi sinxela: cóllese polo mango e introdúcese entre as pedras e nos buratos, cando se atopa un polbo engánchase e tírase del. Outro xeito de pescar co bicheiro foi o que en tempos se empregou na zona de Cambados, coñecido como pescar ao ramo; consistía en botar ramallos de árbores no mar, coa intención de atraer as femias dos polbos e dos congros; á súa vez, as femias atraían os machos da especie e así podían capturalos cunha maior facilidade. Existen variantes dos bicheiros que se empregan para toda unha gama de usos marítimos: atracar e desatracar os barcos, coller os cabos, recoller as cousas que caen ao mar, etc. Así, todos os barcos levan un bicheiro como auxiliar para as diferentes tarefas marítimas.

Raño ou varal empregado polas embarcacións para atracar e desatracar.

Frasco onde se gardan as sambesugas.