calorimetría

Rama da física experimental que trata a medida da enerxía en forma de calor que se transfire en cambios físicos ou químicos. A calor pode ser medida cuantitativamente mediante o calorímetro, coa observación dos efectos que produce. Os máis importantes son: a elevación da temperatura dunha substancia ao subministrarlle calor, o cambio de fase dunha substancia, como de sólido a líquido ou de líquido a gas, e a transformación da enerxía química, eléctrica ou mecánica en calor, ou viceversa. Son obxectos da calorimetría as medidas da calor de combustión, da calor de reacción, da capacidade calorífica, da calor específica e das calores de transformación.